لاہور (این این آئی) پاکستانی اداکارہ انوشے اشرف نے کہا ہے کہ پہلی بار جب سلمان خان کو حقیقت میں دیکھا تو خوشی سنبھالی نہیں جارہی تھی۔اداکارہ انوشے اشرف نجی ٹی وی شو میں شریک ہوئیں جہاں انہوں نے بالی ووڈ سپر سٹار سلمان خان سے ہونے والی پہلی ملاقات کا احوال بیان کیا۔انوشے نے کہا کہ جب ہم بھارت گئے تو سلمان خان سے ہماری ملاقات کسی فلم کی شوٹنگ کے دوران ہوئی، میرے ساتھ میری بہن، کیمرہ مین، رائٹر اور چند اور لوگ بھی موجود تھے، انہیں پہلی مرتبہ اپنی آنکھوں کے سامنے دیکھ کر خوشی سنبھالی نہیں جا رہی تھی۔اداکارہ نے بتایا کہ پھر وہ انٹرویو شروع ہونے سے پہلے کچھ دیر کیلئے اٹھ کر چلے گئے اور کہہ دیا کہ میں شرٹ تبدیل کر کے آتا ہوں، چند سیکنڈ بعد وہ بنا شرٹ پہنے آئے اور اس وقت دو شرٹس ان کے ہاتھ میں تھیں تو مجھ سے پوچھنے لگے کہ کون سی اچھی لگے گی؟انہوں نے مزید کہا کہ اتنے بڑے سپر سٹار کو یوں اصل میں دیکھ کر خوشی کا کوئی ٹھکانہ نہیں تھا ورنہ اس سے پہلے تو ہم نے انہیں بس فلموں میں ہی دیکھا تھا۔
