اسلام آباد (این این آئی)وزیر مذہبی امور انیق احمد نے سعودی سفیر نواف سعید المالکی سے ملاقات کی جس میں وزیر حج ڈاکٹر توفیق الربیعہ کی سربراہی میں سعودی وفد کے دورہ پاکستان پر تبادلہ خیال کیا گیا ۔ ہفتہ کو ہونے والی ملاقات میں سعودی ڈپٹی منسٹر ڈاکٹر حسن مناخرہ، سیکرٹری مذہبی امور، ڈی جی حج بھی شریک تھے ۔وزیر حج ڈاکٹر توفیق الربیعہ کی سربراہی میں سعودی وفد کے دورہ پاکستان پر تبادلہ خیال کیا گیا ۔ وزیر مذہبی امور نے کہاکہ سعودی وفد کا دورہ پاکستان تاریخی اہمیت کا حامل ہو گا۔وزیر مذہبی امور انیق احمد نے کہاکہ سعودی وزیر حج مسجد الحرام اور مسجد نبوی کے چیئرمین ہونے کی وجہ سے انتہائی محترم ہیں۔ انہوںنے کہاکہ سعودی وفد سے حج، عمرہ، روٹ مکہ، مذہبی سیاحت کے فروغ سمیت باہمی دلچسپی کے امور پر تبادلہ خیال ہو گا۔انیق احمد نے کہاکہ آئندہ حج انتظامات میں جدت اور بہتری کیلئے ایم او یو سائن کیے جائیں گے۔ سعودی سفیر نے کہاکہ سعودی شاہ سلمان کیلئے پاکستان نہایت اہمیت کا حامل ہے،کراؤن پرنس محمد بن سلمان نے خود کو پاکستان کا سفیر قرار دیا تھا۔ سعودی سفیر نے کہاکہ پاکستان دوسرا گھر ہے، پاکستانی بھائیوں کو بہت اہمیت دیتے ہیں۔
