اسلام آباد (این این آئی)اسپیکر قومی اسمبلی راجہ پرویز اشرف نے قومی اسمبلی کے شعبہ سیکیورٹی سے وابستہ ڈپٹی سارجنٹ ایٹ آرمز طارق جمیل کی اچانک وفات پر گہرے دکھ اور افسوس کا اظہار کیا ہے۔اسپیکر نے طارق جمیل کے اہلخانہ کے نام تعزیتی پیغام میں طارق جمیل کی اچانک وفات کو انکے اہلخانہ کے لیے ایک بڑا سانحہ قرار دیا ہے۔انہوں نے کہا کہ طارق جمیل ایک فرض شناس افسر تھے ان کی وفات سے پیدا ہونے والا خلا تادیر پر نہیں ہو سکے گا۔انہوں نے کہا کہ غم اور دکھ کی مشکل گھڑی میں سوگوار خاندان کے دکھ اور غم میں برابر کا شریک ہوں۔اسپیکر نے سوگوار خاندان سے دلی تعزیت، ہمدردی اور یکجہتی کا اظہار کیا۔انہوں نے کہا کہ طارق جمیل کی وفات ان کے اہلخانہ کے لیے بڑا صدمہ اور ناقابل تلافی نقصان ہے جسے مدتوں پورا نہیں کیا جا سکتا۔ اسپیکر نے اللہ تعالی سے مرحوم کے درجات کی بلندی اور سوگوار خاندان کو اس ناقابل تلافی نقصان کو برداشت کرنے کے لیے صبر جمیل عطا فرمانے کی دعا کی۔
