گلمرگ(این این آئی) سابق بھارتی اداکارہ ثنا خان نے اپنے شوہر مفتی انس کے ہمراہ جموں کشمیر کے خوبصورت علاقے گلمرگ میں ہنی مون مناتے ہوئے تصاویر شیئر کی ہیں۔گزشتہ ماہ مفتی انس کے ساتھ شادی کے بندھن میں بندھنے والی سابق بالی ووڈ اداکارہ ثنا خان ان دنوں جموں کشمیر میں ہیں۔ انہوں نے گزشتہ روز جموں کشمیر کے خوبصورت علاقے گلمرگ میں کھینچی گئیں اپنی اور شوہر مفتی انس کی تصاویر سوشل میڈیا پر شیئر کی ہیں۔تصاویر میں دونوں برفباری کے دوران انتہائی خوشگوار موڈ میں نظر آرہے ہیں۔ ثنا خان نے اپنی خوشی کا اظہار کرتے ہوئے کیپشن میں ”جنت” لکھا۔ واضح رہے کہ دو ماہ قبل ثنا خان نے اسلام کی خاطر شوبز کی دنیا کو خیرباد کہہ کر اپنے مداحوں کو حیران کردیا تھا۔ شوبز چھوڑنے کے ایک ماہ بعد انہوں نے اچانک مفتی انس کے ساتھ نکاح کے بندھن میں بندھنے کی تصاویر سوشل میڈیا پر شیئر کیں جو دیکھتے ہی دیکھتے وائرل ہوگئیں۔ثنا خان کو جہاں بھارتیوں کی جانب سے نئی زندگی کی مبارکباد دی گئی وہیں پاکستانیوں نے بھی ان کے لیے نیک خواہشات کا اظہار کیا۔
