ممبئی (این این آئی)بالی ووڈ سپر اسٹار شاہ رخ خان نے امریکی پروفیشنل ریسلر، اداکار اور سابق ریپر جان سینا کی جانب سے انکی 1997 کی بالی ووڈ فلم دل تو پاگل ہے کا گانا بھولی سی صورت کو ایک جم میں گنگنانے پر مبنی ویڈیو پر اپنے ردعمل کا اظہار کیا ہے۔ کنگ خان نے جان سینا کو یہ ہندی گیت گاتے دیکھ کر کہا کہ میں آپکو اپنے تازہ ترین گیت بھیج رہا ہوں۔ واضح رہے کہ جان سینا کی ہندی گیت گنگنانے کی ویڈیو کلپ دیکھنے کے بعد شاہ رخ خان نے اپنے سوشل میڈیا ایپ ایکس (سابق ٹوئٹر) پر اتوار کو ردعمل کا اظہار کرتے ہوئے کہا کہ وہ اپنے تازہ ترین گانوں کو جان سینا کے ساتھ شیئر کرینگے تاکہ وہ انہیں گا سکیں۔یاد رہے کہ حال ہی میں بھارتی نژاد کینیڈین ریسلر گوروو سیہرا نے جان سینا کی ایک ویڈیو شیئر کی جس میں جان سینا گوروو سیہرا کے ساتھ ہندی گیت گا رہے ہیں۔ اس ویڈیو کو دیکھنے کے بعد شاہ رخ خان نے اپنے جوابی ٹوئٹ میں دونوں کا شکریہ ادا کیا اور کہا انہیں بہت اچھا لگا۔ میں اب اپنی تازہ ترین گانے آپکو بھیج رہا ہوں اور میری خواہش ہے کہ آپ دونوں( جان سینا اور گوررو سیہرہ) اسے مل کر گائیں۔
