ریاض(این این آئی)سعودی ولی عہد شہزادہ محمد بن سلمان نے کہا ہے کہ وہ حج سیزن کی نگرانی سے متعلق اہم مصروفیت کی بنا پر اس ہفتے جی سیون سربراہی اجلاس میں شرکت نہیں کر پائیں گے۔ جی سیون کا اجلاس جمعہ سے شروع ہونے جا رہا ہے۔غیرملکی خبررساں ادارے کے مطابق سعودی حکومت نے ایک بیان میں کہا کہ شہزادہ محمد بن سلمان نے اطالوی وزیرِ اعظم جارجیا میلونی کو پیغام بھیجا جس میں امورِ حج کی نگرانی سے متعلق ذمہ داریوں کی بنا پر سربراہی اجلاس میں شرکت نہ کر سکنے پر معذرت کی گئی ہے۔یاد رہے 14 جون کو شروع ہونے والے اسلام کے اہم رکن حج کی ادائیگی کے سلسلے میں لئے 10 لاکھ سے زائد عازمین سعودی عرب کے شہر مکہ مکرمہ میں موجود ہوں گے؛ جو مشاعر مقدسہ میں پانچ دن تک مختلف مناسک ادا کریں گے۔
