لندن (این این آئی)معروف پروڈکشن ہاؤس والٹ ڈزنی نے فلم سیریز ”پائریٹس آف دی کیریبیئن” میں جونی ڈیپ کے چھوٹے سے کردار کے خیال کو بھی رد کردیا۔ برطانوی اخبار کے مطابق ”پائریٹس آف دی کیریبیئن” کی 5 فلموں میں ‘کیپٹن جیک اسپیرو’ کا مرکزی کردار اداکرنے والے 57 سالہ اداکار کی سیریز میں واپسی کا معمولی سا راستہ بھی بند ہوگیا ہے۔والٹ ڈزنی نے مبینہ طور پر جونی ڈیپ پر اپنی سابقہ اہلیہ پر تشدد کا کیس آنے کے بعد انہیں اس سیریز میں دوبارہ نہ لینے کا فیصلہ کیا تھا اور چند ماہ قبل اعلان کیا گیا تھا کہ اب آئندہ آنے والی فلم میں خواتین مرکزی کردار ہوں گی۔رپورٹ کے مطابق فلم کے پروڈیوسر چاہتے تھے کہ آنے والی فلم میں جونی ڈیپ کو ایک چھوٹے سے کردار میں دکھایا جائے تاہم ڈزنی انتظامیہ کی جانب سے اس آئیڈیے کو رد کردیا گیا۔خیال رہے کہ اس سیریز کی پہلی فلم 2003 میں ریلیز کی گئی تھی جس کی کامیابی کے بعد 2017 تک اس کی پانچ فلمیں بنائی گئی تھیں جن میں ‘کیپٹن جیک اسپیرو’ کا کردار جونی ڈیپ نے نبھایا تھا جسے مداحوں نے کافی پسند کیا تھا۔
