کراچی (این این آئی)ماں بننا تقریبا ہر عورت کا خواب ہوتا ہے، تاہم اگر بعض پیچیدگیوں کے باعث کسی خاتون کا حمل ضائع ہوجائے تو یقینا وہ درد کا شکار ہوجائیں گی۔ایسے ہی درد کا شکار ماڈل فروا علی کاظمی بھی ہوئیں، جنہوں نے سال 2021 کے پہلے ہی دن انکشاف کیا کہ 2020 میں ان کا تین ماہ کا حمل ضائع ہوگیا۔ماڈل فروا علی کاظمی اکتوبر 2020 میں کورونا کا شکار بھی ہوگئی تھیں، تاہم اب انہوں نے پچھلے سال کے اپنے سب سے بڑے غم پر بات کرکے خواتین کو جذبہ دیا ہے کہ اگر ان کے ساتھ بھی حمل کے دوران کوئی پیچیدگیاں آجائیں تو وہ بھی ان پر کھل کر بات کریں۔ماڈل نے اپنی لمبی انسٹاگرام پوسٹ میں دو ایکسرے کی تصاویر شیئر کرتے ہوئے اپنے حمل ضائع ہونے کی تفصیلات لکھیں، جن کے مطابق ان کا حمل تیسرے مہینے ضائع ہوا۔ فروا علی کاظمی نے لکھا کہ انہیں امید تھی کہ وہ 7 ماہ بعد اپنے بچے کو گھر لے آئینگی، لیکن اگلے ہی روز انہیں معلوم ہوا کہ ان کے پیٹ میں پلنے والے جنین کے دل نے تین ماہ بعد بھی دھڑکنا شروع نہیں کیا اور پھر ایسی ہی بعض پیچیدگیوں کے باعث ان کا حمل ضائع ہوگیا۔فروا علی کاظمی نے کہا کہ حمل کا ضائع ہوجانا یا حمل نہ ٹھہرنا ایسے موضوعات ہیں جن پر خواتین بات نہیں کر پاتیں اور ان موضوعات پر بات کرنا آسان بھی نہیں ہے لیکن خواتین کو ایسے واقعات پر اب کھل کر بات کرنے کی ضرورت ہے۔فروا علی کاظمی نے کہا کہ انہوں نے اپنے کبھی پیدا نہ ہونے والے بچے کیلئے پیار بھرے خطوط بھی لکھے تھے اور اب وہ ان خطوط کی طرف دیکھنے کی ہمت بھی نہیں کرتیں۔انہوں نے سال نو کے حوالے سے کہا کہ اگرچہ پچھے سال نے ہمیں کوئی ایسا موقع نہیں دیا کہ ہم خوشی سے نئے سال کو خوش آمدید کہ سکیں لیکن اس باوجود ہمیں مثبت رہنا چاہیے اور مستقبل کے اچھے ہونے کی امید رکھنی چاہیے۔پوسٹ کے آخر میں انہوں سب کیلئے دعا کی کہ 2021 سب کو خوشیاں عطا کرے۔
