ریاض(این این آئی)سعودی عرب کے وزیر مملکت برائے خارجہ امور نے ملک اورعالمی سطح پراعتدال پسندانہ سوچ کو فروغ دینے کے حوالے سے گراں قدر خدمات انجام دینے کے صلے میںایوارڈ برائے اعتدال حاصل کیا ہے۔عرب ٹی وی کے مطابق خادم الحرمین الشریفین کے مشیر اور مکہ معظمہ کے گورنر شہزادہ خالد الفیصل نے بتایا کہ وزرا کونسل کے رکن اور وزیر مملکت برائے خارجہ امور عادل الجبیر کوھجری سال 1441ھ کا ایوارڈ برائے اعتدال سے نوازا گیا ہے۔شہزادہ خالد الفیصل نے ان خیالات کا اظہار جدہ میں شاہ عبدالعزیز یونی ورسٹی میں منعقدہ ایک تقریب سے خطاب میں کیا۔ اس موقعے پر ایوارڈ کے بورڈ آف ڈائریکٹر کے وائس چیئرمین ڈاکٹر عبدالرحمان الیوبی اور اعتدال انسٹیٹیوٹ کے ڈین ڈاکٹر حسن یحیی المناخرہ بھی موجود تھے۔تقریب سے خطاب میں شہزادہ الفیصل نے کہا کہ مجھے یہ جان کر خوشی ہوئی ہے کہ اعتدال ایوارڈ کے چوتھے سال یعنی 2020 کو یہ ایوارڈ وزیر مملکت برائے خارجہ امور عادل الجبیر کو دیا گیا ہے۔ یہ ایوارڈ عادل الجبیر کی اعتدال پسندانہ سوچ کی عکاسی کرتا ہے۔ انہوں نے کہا کہ عادل الجبیر نے دنیا بھر میں سعودی عرب کی اعتدال پسندانہ اور رواداری کی سوچ کی حقیقی معنوں میں ترجمانی کی ہے۔
