برلن (این این آئی )جرمن پولیس نے ایک قصبے میں جاری چرچ سروس میں مداخلت کر کے لوگوں کو منتشر کر دیا۔ اس عبادت میں ڈیڑھ سو افراد کے قریب لوگ شریک تھے۔ اس سروس کو کورونا لاک ڈائون کی خلاف ورزی قرار دیا گیا ہے۔غیرملکی خبررساں ادارے کے مطابق پولیس کارروائی جرمنی کے سب سے گنجان آباد مغربی ریاست نارتھ رائن ویسٹ فالیا کے ایک قصبے ہیرفورڈ کے ایک گرجا گھر پر اچانک چھاپہ مار کر مکمل کی گئی۔ اس عبادت میں پولیس کے مطابق ایک سو پچاس کے لگ بھگ افراد شریک تھے، جنہوں نے ماسک بھی نہیں پہنے ہوئے تھے۔ اس بیان میں واضح کیا گیا کہ عبادت کا اجتماع میں اتنے زیادہ افراد کی ایک ساتھ شرکت کو کورونا وائرس کی وبا کے نافذ کردہ لاک ڈائون کی خلاف ورزی تھا۔کورونا وبا کی دوسری لہر کے دوران جرمنی میں حکومت نے سخت پابندیوں کے حامل لاک ڈائو ن کا نفاذ کر رکھا ہے۔ کھانے پینے اشیا کی دوکانوں یا سپر مارکیٹوں کے علاوہ ہر قسم کے کاروبار کی مارکیٹیں اور شاپنگ مالز وغیرہ بند ہیں۔ان ضوابط کے تحت کسی بھی بند مقام میں زیادہ سے زیادہ بیس افراد کے شریک ہونے کی اجازت ہے۔ ان میں عبادت کا اجتماع بھی شامل ہیں۔ اسی ضابطے کے تحت پولیس نے نارتھ رائن ویسٹ فالیا میں ویہن پہاڑیوں کے دامن میں واقع ہیرفورڈ قصبے کے گرجا گھر پر چھاپہ مارا تھا۔پولیس کے مطابق گرجا گھر میں جاری عبادت میں شریک افراد نے حفظانِ صحت کے اصولوں کا بھی احترام نہیں کیا ہوا تھا اور سبھی نے سماجی فاصلے کو بھی نظر انداز کر رکھا تھا۔ تمام افراد بشمول بچے ماسک کے بغیر تھے۔ ان تمام افراد کو کورونا لاک ڈان کی خلاف ورزی کی فردِ جرم کا سامنا ہے۔
