راولپنڈی (این این آئی) پاک فوج کے ترجمان میجر جنرل بابر افتخار نے کہاہے کہ پی ڈی ایم کے سربراہ مولانا فضل الرحمن اگر راولپنڈی آنا چاہتے ہیں توچائے پانی پلائیں گے ۔ پیر کو میڈیا بریفنگ کے دور ان ایک صحافی نے مولانا فضل الرحمن کے راولپنڈی آنے کے بیان کے حوالے سے سوال کیا تو اس کے جوا ب میں ترجمان پاک فوج میجر جنرل بابر افتخار نے کہاکہ مجھے راولپنڈی آنے میں اس کی کوئی وجہ نظر نہیں آتی ہے ، اگر وہ آنا چاہتے ہیں تو انشا ء اللہ چائے پانی پلائیں گے اور دیکھ بھال کریں گے اس سے زیادہ میں کیا کہہ سکتا ہوں ۔انہوں نے کہا کہ فوج پر تنقید اور الزامات میں کوئی حقیقت ہو تو جواب دیں، ان چیزوں میں ملوث ہونا نہیں چاہتے، جو ہمار ا کام ہے وہ کریں گے۔ترجمان پاک فوج نے کہاکہ سیاسی معاملات پر تبصرے سے گریز کرتا ہوں لیکن یہ نہیں کہا کہ فوج مخالف بیانات سے تشویش نہیں، جوبھی بات چیت کی جارہی ہے، اس کے باجود اپنا کام کررہے ہیں، فوج کا مورال بلند ہے، جس نوعیت کیالزامات لگائے جارہے ہیں ان میں کوئی وزن نہیں۔انہوں نے کہا کہ الیکشن کی بات کی جاتی ہے، پاک فوج کو حکومت وقت نے الیکشن کرانے کا کہا، پاک فوج نے اپنی پوری ذمہ داری اوردیانتداری سے الیکشن کرائے، الیکشن پر کسی کو شک ہے یا مسئلہ ہے تو پاکستان کے ادارے کام کررہے ہیں، اس پر متعلقہ اداروں کو ہی فیصلہ کرنا ہے، ن کو ہی اپروچ کرنا چاہیے۔
