لاہور( این این آئی)نامور اداکارہ ریما نے کہاہے کہ میںنے جس دور میں کام کیا وہ فلم انڈسٹری کا سنہرا دورتھا،اس دورمیں فلم انڈسٹری کو فنکاروں کی ایک بڑی کھیپ میسر تھی اور مسلسل فلمیںبن رہی تھیں،افضل خان نے صاحبہ کو حاصل کرنے کی خواہش کو اپنی سچی لگن ،محبت ،محنت او رنیک نیتی سے پورا کیا ۔ایک انٹر ویو میں انہوںنے کہا کہ میری خوش قسمتی ہے کہ میری تمام فلمیں کامیابی سے ہمکنار ہوئیں ، اس میں میری محنت کے ساتھ ساتھ سینئرز کی رہنمائی کابڑا ہاتھ ہے ۔انہوںنے کہاکہ ہمارے دورمیںپروفیشنل ازم تھااور ہر فنکار اپنے کام کے ساتھ مکمل انصاف کرتا تھا۔ اس کی بڑی مثال افضل خان (ریمبو)ہے جس نے انتھک محنت کرکے اپنا مقام بنایا ،میں نے اس شخص کو دیکھا ہے جو سارادن فلم کی شوٹنگ میں مصروف رہتا تھا اورپانچ بجے خود گاڑی ڈرائیو کر کے راولپنڈی جاتااوروہاں اسٹیج ڈرامہ کرنے کے بعد واپس آ کر صبح دس بجے سیٹ پر موجود ہوتا تھا۔ انہوں نے کہاکہ افضل خان نے صاحبہ کو حاصل کرنے کی خواہش کو سچی لگن ،محبت ،محنت او رنیک نیتی سے پورا کیا اور آج یہ جوڑا خوشگوار زندگی بسر کر رہا ہے ۔
