اسلام آباد (این این آئی)پیپلز پارٹی کے سینیٹر مصطفی نواز کھوکھر نے کہا ہے کہ صرف گزشتہ روز کے دن سیکیورٹی فورسز کے دس بہادر جوانوں نے مذہبی شدت پسندوں سے لڑتے ہوے جانیں دیں ، فوج کے دو اور پولیس کے چار جوان خیبر پختونخواہ میں ٹی ٹی پی جبکہ چار جوان پنجاب میں ٹی ایل پی کے ہاتھوں شہید ہوئے۔ اپنے بیان میں مصطفی نواز کھوکھر نے کہاکہ پولیس اور فوج کے جوان کب تک اسلام آباد اور پنڈی کی غیر دانشمندانہ پالیسیوں کی قیمت ادا کرتے رہیں گے؟ مصطفی نواز کھوکھر نے کہاکہ آج بھی ہمارے مسائل کا حل نیشنل ایکشن پلان پر من و عن عمل کرنے پر ہے ، مصطفی نواز کھوکھر نے کہا کہ مذہب اور شدت پسند تنظیموں کو جب بھی سیاسی مقاصد کے لئے استعمال کیا جائے گا یہی نتیجہ نکلے گا ، یہ بات ہماری ریاست اور سیاسی جماعتوں کے پلے کب پڑے گی ؟ ۔ انہوںنے کہاکہ اس موقع پر اگر ہم صرف یکجا ہو کر پنجاب پولیس کہ ساتھ کھڑے ہو جائیں تو رینجرز کی بھی ضرورت نہیں ، پنجاب پولیس میں ان فسادیوں سے نمٹنے اور ان کی تسلی بخش چھترول کرنے کی مکمل اہلیت ہے۔ انہوںنے کہاکہ میں کم از کم اپنی ذات کی حد تک پنجاب پولیس کے جوانوں اور افسران کے ساتھ اس مشکل گھڑی میں کھڑا ہوں ۔
