ممبئی (این این آئی)بھارتی اداکارہ انوشکا شرما کا دل جنوبی افریقی کرکٹ لیجنڈ اے بی ڈی ویلیئرز کی ریٹائرمنٹ کی خبر سے ٹوٹ گیا۔انسٹاگرام پر انوشکا شرما نے ڈی ویلیئرز کی تصویر کے ساتھ ان سے متعلق پیغام بھی شیئر کیا ہے۔جنوبی افریقی کرکٹر نے 37 سال کی عمر میں کھیل کے تمام ہی فارمیٹ سے ریٹائرمنٹ کا اعلان کیا ہے۔اداکارہ جو بھارتی ٹیم کے سابق کپتان ویرات کوہلی کی اہلیہ بھی ہیں، نے اے بی ڈی ویلیئرز کی ریٹائرمنٹ کے اعلان پر شیئر کئے گئے پیغام میں اسے دل توڑنے والی خبر قرار دیا۔انوشکا شرما نے کہا کہ جنوبی افریقی کرکٹر اْن عظیم مردوں اور کھلاڑیوں میں سے ایک ہیں، جنہیں میں نے دیکھنے اور جاننے کا اعزاز حاصل کیا۔اداکارہ نے اے بی ڈی ویلیئرز کیلئے نیک خواہشات کا اظہار کیا اور ٹوٹے دل کے ایموجی کے ساتھ لکھا کہ آپ لوگ ہر خوبصورت چیز کے مستحق ہیں، یہ خبر واقعی دل توڑنے والی ہے۔اس سے قبل ٹوئٹر پر ویرات کوہلی بھی جنوبی افریقی بیٹسمین کے کرکٹ کو خیرباد کہنے کے اعلان پر شدید افسردہ دکھائی دیئے۔پیغام میں ویرات کوہلی نے کہا کہ ‘اے بی ڈی ویلیئرز ہمارے دور کے بہترین کھلاڑی اور سب سے متاثر کن شخص ہیں جن سے میں ملا ہوں۔’اْنہوں نے کہا کہ آپ کے فیصلے سے میرے دل کو تکلیف پہنچتی ہے لیکن میں جانتا ہوں کہ آپ نے اپنے اور اپنے خاندان کیلئے بہترین فیصلہ کیا ہے جیسا کہ آپ نے ہمیشہ کیا ہے۔’
