راولپنڈی (این این آئی)وفاقی وزیر سائنس و ٹیکنالوجی سینیٹر شبلی فراز نے روات میں بھنگ کی کاشت کا افتتاح کردیا،ایک ایکڑ پر بھنگ کی کاشت تین ماہ میں تیار کی گئی۔ میڈیا سے گفتگو کرتے ہوئے وفاقی وزیر نے کہاکہ اگست میں بھنگ کو کاشت کیا تھا، اب بھنگ کی کٹائی کا وقت آگیا ہے۔ انہوںنے کہاکہ کے پی بلوچستان گلگت سے بھنگ لی تھی ،بھنگ کی کاشتکار سے لوگوں کی فصلوں میں اب ورائٹی آئے گی، دوائیوں میں بھی یہ کام آتی ہے۔ وفاقی وزیر نے کہاکہ انڈسٹریل میں بھنگ کی فائبر کام آتی ہے ، درآمد برآمد دونوں میں کام آتا ہے۔ وفاقی وزیر نے کہا کہ وزیراعظم نے زیتون کی مہم چلائی تھی اور اب پروڈیکشن بھی شروع ہوگئی ہے، پہلے زیتون کا تیل ہم دیکھتے تھے امپورٹ ہوتا آیا ہے، ہماری حکومت اس قسم کے پراجیکٹس کی سرپرستی کرنا چاہتی ہے۔ وفاقی وزیر نے کہاکہ بھنگ کا سب سے مہنگا حصہ اسکا بیچ ہے، بھنگ پر تاثر ہے کہ غلط استعمال ہوتا ہے ،جو بھنگ سے پراڈیکٹس نکلتے ہیں وہ ڈرگ سے زیادہ منافع بخش ہیں، دس گناہ منافع ہوگا تو ڈرگ میں کمی آئے گی۔ انہوںنے کہاکہ ہم نے اپنے ملک کی ترقی دیکھنی ہے، معاشی طور پر مضبوط ہونا ہے۔ وفاقی وزیر نے کہاکہ ہم ایک پالیسی لارہے ہیں اور ادرک پر بھی کام کر رہے ہیں، ہماری وزارت سائنس کی زبردست ٹیم ہے۔ وفاقی وزیر نے کہاکہ جنوری میں ہم بہت بڑا سائنس ٹیکنالوجی فیئر بھی کررہے ہیں، چاہتے ہیں اپنے تمام ریسورسز سے چیزیں ملک خود بنائے۔ انہوںنے کہاکہ بھنگ کا ٹرن اوور بھی بہت تیز ہے،بھنگ کی لائسنسنگ ،این او سی ،یہ سب کرینگے ۔ انہوںنے کہاکہ منفی باتیں ہوتی رہتی ہیں ہم نے ان پر توجہ نہیں دینی۔
