اسلام آباد (این این آئی)پاکستان مسلم لیگ (ن) کے ڈپٹی سیکرٹری جنرل عطاء اللہ تارڑ نے انتخابی مہم پر الیکشن کمیشن کے خلاف عمران خان اور اسد عمر کی درخواست کو عدم اعتماد کی کامیابی کا حکومتی اعتراف قرار دے دیا ۔ اپنے بیان میں انہوں نے کہاکہ عمران نیازی کی درخواست الٹا چور کوتوال کو ڈانٹے کے مترادف ہے ،دنیا میں یہ پہلی حکومت ہے جو اپوزیشن کے خلاف جلسے کرتی ہے اسمبلی میں نہیں آتی ۔ انہوںنے کہاکہ آئین اور قانون سے نابلد حکومت من مانی کرنا چاہتی ہے، خود کو قانون کے تابع نہیں سمجھتی۔ انہوںنے کہاکہ وفاقی دارالحکومت اسلام آباد میں وزیراعظم لگے’ شخص کے پاس ملک اور عوام کی خدمت میں دکھانے کو کچھ نہیں ،قانون سے تجاوز کرنے والے الیکشن کمشن پر قانون سے تجاوز کا الزام لگا رہے ہیں ۔ انہوںنے کہاکہ درخواست ثبوت ہے کہ عمران نیازی کا مزاج جمہوری ہے اور نہ کردار ۔ انہوں نے کہاکہ الیکشن کمیشن کے آئینی و قانونی احکامات کی خلاف ورزی پر عمران نیازی کو سزا ملنی چاہیے ۔ انہوںنے کہاکہ مغربی جمہوریت کی مثالیں دینے والے کو یہ تو پتہ ہونا چاہئے کہ مغرب میں سرکاری وسائل استعمال کر کے وزیراعظم اور حکمران جماعت کے جلسے نہیں ہوتے۔
