ممبئی (این این آئی)معروف بھارتی کامیڈین اور کپل شرما شو کے ہوسٹ کپل شرما ان دنوں بھارتی اداکارہ اور فلم ڈائریکٹر نندیتا داس کی فلم میں اپنے کردار کی شوٹنگ کیلئے شمالی مشرقی بھارتی ریاست اوڑیسہ کے صدر مقام بھوبینسور میں موجود ہیں۔ اس فلم میں کپل ایک فوڈ ڈلیوری رائیڈر کا کردار ادا کرتے نظر آئینگے، تاہم ان کے ایک پرستار نے ان کی ایک تصویر شیئر کی ہے جس میں کپل شرما ایک اورنج ٹی شرٹ میں ملبوس ایک بائیک پر اپنے پیچھے ایک ڈلیوری بیگ لگائے بیٹھے نظر آرہے ہیں۔ تصویر کے ساتھ اس فین نے کیپشن تحریر کیا، سر میں نے آج آپ کو لائیو دیکھ لیا۔ فین کے اس پوسٹ کے جواب میں کپل نے لکھا، کسی کو بتانا مت۔ ایک اور فین نے کمنٹ کیا، میں کپل کو ڈھونڈ رہا تھا اس میں۔ سیویگی والا (بھارتی فوڈ ڈلیوری کمپنی) بندہ کپل نکلا، ایک اور نے پوچھا، سر کیا دوسرا کام ڈھوند لیا ہے؟ ایک نے مذاق کرتے ہوئے لکھا، پارٹ ٹائم جاب کرتے ہیں کپل پاجی، ایک اور نے کہا، یہ تو سچ میں کپل ہیں!!۔
