اسلام آباد (این این آئی)نائب صدر پیپلز پارٹی سینیٹر شیری رحمان نے کہاہے کہ جمہوریت اور پاکستان کو مزید غیر مستحکم کرنے سے پہلے وزیراعظم کو گھر جانا چاہیے۔اپنے بیان میں انہوںنے کہاکہ اناپرست عمران خان کے لیے اب کوئی راستہ نہیں بچا ہے، عمران خان نے اپنا مینڈیٹ کھو دیا ہے۔ انہوںنے کہاکہ وزیراعظم ہر گزرتے دن کے ساتھ پارلیمنٹ میں اپنی تعداد کے ساتھ ساتھ حمایت بھی کھو رہا ہے۔ انہوںنے کہاکہ کوئی عمران خان کو سمجھائے کہ حکومت پوری زندگی کے لیے نہیں ہوتی، یہ بادشاہت نہیں ہے۔ انہوںنے کہاکہ وزیراعظم پارلیمنٹ کی لڑائی کو سڑکوں پر لے جانے پر تلا ہوا ہے، اپنی حکومت کو بچانے کیلئے آئین کو پامال کرنا ان کی ذہنی حالت کی عکاسی کرتا ہے۔ انہوںنے کہاکہ سیاسی شکست پی ٹی آئی کا انجام بن چکا ہے، ان کے ساتھ نہ مانگے تانگے کے ارکان ہیں نا ہی اتحادی۔ سینیٹر شیری رحمن نے کہاکہ اسپیکر کو چاہیے وہ وزیراعظم کو بچانے کی کوششیں بند کریں، تاخیری حربے اب وزیراعظم کو نہیں بچا پائینگے۔
