نئی دہلی (این این آئی)بھارت کے دورے پر آئے ہوئے امریکی نائب قومی سلامتی کے مشیر دلیپ سنگھ نے بھارت کو وارننگ دی ہے اور کہاہے کہ امریکی پابندیوں کی خلاف ورزی کرنے پر بھارت سمیت کسی بھی ملک کیلئے سخت نتائج ہوں گے۔میڈیارپورٹس کے مطابق دلیپ سنگھ نے کہا کہ روس کے مرکزی بینک کے ذریعے مقامی کرنسی کا لین دین کرنے اور ادائیگی کے نئے طریقہ کار بنانے والے ملکوں کو نتائج کا سامنا کرنا پڑے گا۔امریکی نائب مشیر قومی سلامتی نے کہا کہ خواہش مند ہیں کہ اتحادی اور شراکت کار ملک ایسا طریقہ کار نہ بنائیں جو روسی کرنسی روبل کو سہارا دیں۔ ڈالر پر مبنی مالیاتی نظام کو کمزور کرنے کی کوشش نہ کی جائے۔اس سلسلے میں رواں ہفتے روس اور بھارت کے بینک حکام کے درمیان بھی ملاقات ہوئی ۔دلیپ سنگھ نے کہا کہ اگر بھارت روس پر اپنا انحصار کم کرتا ہے تو امریکا بھارت کو توانائی اور دفاعی ہارڈویئر کی تیاری میں مدد دینے کیلئے تیار ہے۔بھارتی آئل ریفائنریز نے یوکرین جنگ شروع ہونے کے بعد سے 13 ملین بیرل سے زیادہ روسی تیل خریدا ہے، یہ مقدار گزشتہ سال کے مقابلے میں بہت زیادہ ہے، بھارت نے گزشتہ سال 16 ملین بیرل روسی تیل خریدا تھا۔
