چیئرمین (پی سی بی) کا انٹرنیشنل سٹیڈیمز ڈیزائن کرنے والی معروف برطانوی کمپنی کے ہیڈ آفس کا دورہ ،تین قومی سٹیڈیمز کی اپ گریڈن منصوبے بارے بریفنگ

لندن(این این آئی)چیئرمین پاکستان کرکٹ بورڈ (پی سی بی) محسن نقوی کی انٹرنیشنل سٹیڈیمز ڈیزائن کرنے والی دنیا کی معروف کمپنی بی ڈی پی پیٹرن کے ہیڈ آفس آمد پر کمپنی کے چیئرمین کرس ہارڈنگ نے خیر مقدم کیا،پاکستان کے ہائی کمشنر ڈاکٹر محمد فیصل، چیف آپریٹنگ آفیسر پی سی بی سلمان نصیر ، بی ڈی پی پیٹرن کے سپورٹس ڈویژن کے سربراہ ڈیپش پیٹل، ڈ یزائن ڈائریکٹر جان سکائوٹ کوہلی، سینئر آرکیٹیکٹ انٹوینو ٹینزریلا، لیڈ پراجیکٹ ڈائزینرز ماریہ بوسورا، ڈینینل گولڈن برگ اور ڈوویلی بویلرائٹ بھی اس موقع پرموجود تھے۔پاکستان کرکٹ بورڈ کی جانب سے جاری اعلامیہ کے مطابق چئیرمین پی سی بی محسن نقوی نے اس موقع پر گفتگو کرتے ہوئے کہا کہ قذافی سٹیڈیم، نیشنل بینک سٹیڈیم کراچی اور راولپنڈی سٹیڈیم کو بین الاقوامی معیار کے مطابق اپ گریڈ کیا جا رہا ہے۔ اس موقع پر بی ڈی پی حکام نے ڈرائنگز کے ذریعے سٹیڈیمز کے اپ گریڈیشن پراجیکٹ کے بارے تفصیلی بریفنگ دی۔چیئرمین پی سی بی محسن نقوی نے تینوں سٹیڈیمز کے معیاری ڈیزائنز پر اطمینان کا اظہار کیا اور انہیں تیار کرنے والے انجینئرنگ و آرکیٹیکٹ سٹاف کی کارکردگی کو سراہا۔ محسن نقوی نے کہا کہ ڈیزائنز کے مطابق سٹیڈیمز کے تعمیراتی کاموں کو مقررہ مدت میں مکمل کرنا بڑا ٹاسک ہے،ہماری پوری ٹیم اس چیلنجنگ کام کو دن رات محنت کر کے جلد پایہ تکمیل تک پہنچائے گی،چیمپئنز ٹرافی سے قبل تینوں سٹیڈیمز کی اپ گریڈیشن مکمل کرائیں گے۔انہوں نے کہا کہ تاریخ میں پہلی بار سٹیڈیمز میں اتنے بڑے پیمانے پر شائقین کرکٹ کے لئے سہولتوں کو بہتر بنایا جا رہا ہے،اس میگا پراجیکٹ کی ذاتی طور پر نگرانی کر رہا ہوں،پوری کوشش کریں گے کہ کام کو متعین مدت سے قبل مکمل کیا جائے۔ اس موقع پر بریفنگ کے دوران چیئرمین پی سی بی کو بتایا گیا کہ تینوں سٹیڈیمز کے ڈیزائنز کو عالمی معیار کے مطابق تیار کیا گیا ہے،بی ڈی پی پیٹرن کے حکام نے قذافی سٹیڈیم لاہور، نیشنل بینک سٹیڈیم کراچی اور راولپنڈی سٹیڈیم کے نئے ڈیزائنز سے آگاہ کیا۔بی ڈی پی پیٹرن دنیا کے کئی ممالک میں انٹرنیشنل معیار کے تقریبا 200 چھوٹے بڑے سٹیڈیمز ڈیزائن کر چکی ہے اور اب تک ایک ہزار سے زائد ڈیزائن کوالٹی ایوارڈ حاصل کر چکی ہے، کمپنی کی بنیاد 63 برس قبل رکھی گئی۔