لاہور(این این آئی)امام و خطیب مسجد نبوی الشیخ ڈاکٹر صلاح بن محمد البدیر اپنا سات روزہ خیر سگالی دورہ مکمل کر کے بدھ کے روز واپس مدینہ منورہ روانہ ہو گئے، لاہور ایئرپورٹ پر چوہدری سالک حسین، سپیکر پنجاب اسمبلی ملک احمد خان، حافظ طاہر اشرفی اور سعودی سفیر نواف سعید المالکی نے معزز مہمان کو الوداع کیا۔ اس موقع پر معزز مہمان نے پاکستان میں قیام کے دوران عوام کی الحرمین الشریفین سے والہانہ محبت اور عقیدت پر شکریہ ادا کیا اور کہا کہ پاکستانی عوام اور حکومت پاکستان سے ملنے والا احترام بھلایا نہیں جا سکتا۔دورہ پاکستان کے دوران مسجد نبوی کے امام و خطیب نے صدر مملکت آصف علی زرداری، وزیراعظم محمد شہباز شریف، آرمی چیف جنرل عاصم منیر، سپیکر قومی اسمبلی سردار ایاز صادق، چیئرمین سینیٹ سید یوسف رضا گیلانی، گورنر پنجاب سردار سلیم حیدر خان، وزیر اعلی پنجاب مریم نواز شریف، مولانا فضل الرحمن اور متعدد اعلی شخصیات سے ملاقاتیں کیں۔ معزز مہمان نے فیصل مسجد اسلام آباد میں نماز جمعہ کا خطبہ دیا اور امامت کروائی۔ انہوں نے تاریخی بادشاہی مسجد لاہور، بحریہ ٹائون کی گرینڈ مسجد اور جامعہ اشرفیہ لاہور میں بھی نمازوں کی امامت کروائی اور ملک پاکستان اور امت مسلمہ کی ترقی و خوشحالی کیلئے خصوصی دعائی کیں۔
