نیوکلیئر ہتھیاروں سے متعلق ڈاکٹرائن بہتر بنا رہے ہیں،تیسری عالمی جنگ ہوئی تو اس سے صرف یورپ متاثر ہوگا، وزیرخارجہ

ماسکو(این این آئی )روس نے ایٹمی ہتھیار استعمال کرنے کی پالیسی کو موجودہ تقاضوں سے ہم آہنگ کرنا شروع کردیا ہے،غیرملکی خبررساں ادارے کے مطابق وزیر خارجہ سرگئی لاوروف نے بتایا کہ انکا ملک نیوکلیئر ہتھیاروں سے متعلق ڈاکٹرائن بہتر بنا رہا ہے۔روسی وزیر خارجہ سرگئی لاوروف نے یمنی وزارت خارجہ کے سربراہ کے ساتھ پریس کانفرنس میں کہا کہ امریکیوں کے نزدیک تیسری عالمی جنگ ہوئی تو اس سے صرف یورپ متاثر ہوگا، تاہم واشنگٹن کو یہ بات جاننا چاہیے کہ روس کا اپنا ڈاکٹرائن ہے، جس میں نیوکلیئر ہتھیاروں سے متعلق بھی ڈاکٹرائن شامل ہے۔ انہوں نے کہا کہ اس ڈاکٹرائن کو اس وقت واضح کیا جارہا ہے جس سے امریکی حکام بھی واقف ہیں۔روس کے صدر ولادیمر پوٹن نے جون کے اواخر میں امکان ظاہر کیا تھا کہ نیوکلیئر ڈاکٹرائن تبدیل کردیا جائے گا۔ انہوں نے کہا تھا کہ نیوکلیئر ہتھیار ممکنہ استعمال کرنے کے آغاز کا درجہ کم کرنے سے متعلق ایڈجسٹمنٹ کی جارہی ہے۔صدر پوٹن کا کہنا تھا کہ ایسے نیوکلیئر ہتھیار بنائے جارہے ہیں جو بہت ہی کم yield کے حامل ہیں۔ انہوں نے کہا کہ یورپی حلقوں میں یہ بحث ہورہی ہے کہ ایسے ہتھیار بلا خوف استعمال کیے جاسکتے ہیں۔