اسلام آباد (این این آئی)وزیراعظم محمدشہبازشریف نے عالمی برادری پر زور دیاہے کہ وہ غزہ میں فوری اور غیر مشروط جنگ بندی کی اپنی ذمہ داری نبھائے،مشرق وسطی میں پائیدار امن کے لئے آزاد فلسطینی ریاست کاقیام ضروری ہے، پاکستان خطے کی ترقی کے لئے اپنا بھرپور کردار ادا کرتا رہے گا۔ بدھ کو شنگھائی تعاون تنظیم کے سربراہان حکومت کی کونسل کے 23 ویں اجلاس کی اختتامی نشست میں خطا ب کرتے ہوئے وزیراعظم نے ایس سی او رہنمائوں سے مخاطب ہوتے ہوئے کہاکہ اس موقع پر ہم غزہ میں حالیہ جاری نسل کشی کو نظر انداز نہیں کرسکتے۔ انہوںنے کہاکہ عالمی برادری کو بربریت روکنے کیلئے اقدامات کرناہوں گے،غزہ میں جارحیت ایک المیہ ہے،وہاں پر فوری اور غیر مشروط جنگ بندی کی ضرورت ہے۔ وزیراعظم نے کہا کہ مشرق وسطی میں پائیدار امن کے لئے آزاد فلسطینی ریاست کا قیام ناگزیر ہے جس کی سرحدیں 1967 سے قبل کی بنیا د پرہوں اور جس کا دارالحکومت القدس الشریف ہو۔ وزیراعظم نے کہاکہ کونسل کا 23 واں اجلاس کامیابی سے اختتام پذیر ہوا ہے جس میں رکن ممالک نے اپنی آنے والی نسلوں کے بہتر اور پائیدار مستقبل کیلئے مشترکہ عزم کو اجاگر کیا ۔ وزیراعظم نے کہاکہ ایس سی او کے اہداف اور مقاصد کے حصول کیلئے پاکستان کی جانب سے مکمل حمایت کے عزم کااعادہ کرتے ہیں۔ انہوں نے کہا کہ ہمیں اپنے باہمی تعلقات کو سیاسی اختلافات اور تقسیم سے بالاتر رکھتے ہوئے مشترکہ چیلنجز کو حل کرنے اور ایک دوسرے کے ہاتھوں میں ہاتھ دے کر اپنے عوام کے باہمی مفاد ، ترقی اور استحکام کے لئے کردار ادا کرنا ہو گا۔ اس موقع پر وزیراعظم نے روس کے وزیراعظم میخائل مشوستن کو کونسل کی چیئرمین شپ سنبھالنے پر مبارکباد دیتے ہوئے کہاکہ پاکستان کی جانب سے ان کو مکمل تعاون کی یقین دہانی کرواتے ہیں۔ وزیراعظم نے شنگھائی تعاون تنظیم کے اجلاس کے کامیاب انعقاد پر منتظمین کو مبارکباد دی۔
وزیراعظم محمدشہبازشریف نے عالمی برادری پر زور دیاہے کہ وہ غزہ میں فوری اور غیر){kind=link}