اسلام آباد (این این آئی)ڈپٹی وزیراعظم و وزیر خارجہ اسحاق ڈار(کل) ترکیہ روانہ ہوں گے جہاں وہ او آئی سی وزرائے خارجہ کے اجلاس میں پاکستان کی نمائندگی کریں گے۔اجلاس (کل)21جون سے ترکیہ میں شروع ہو رہا ہے جس میں مسلم ممالک کے وزرائے خارجہ خطے میں جاری کشیدگی، فلسطین و ایران کی صورتحال اور دیگراہم عالمی وعلاقائی امور پرتبادلہ خیال کریں گے۔دفتر خارجہ کے مطابق اسحاق ڈار اجلاس میں ایران کے خلاف اسرائیلی جارحیت پر پاکستان کا واضح اور اصولی موقف پیش کریں گے۔اس کے علاوہ وہ پاک بھارت سیزفائر کے بعد جنوبی ایشیا میں پیدا ہونے والی صورتحال، امن و استحکام کی کوششوں اور پاکستان کے موقف سے بھی اجلاس کو آگاہ کریں گے۔
