اسلام آباد(این این آئی)سردار ایاز صادق نے وفاقی وزیر برائے قانون و انصاف کے عہدے کا چارج سنبھال لیا۔ وفاقی وزیر سردار ایاز صادق کی وزارت قانون و انصاف کا قلمدان ملنے پر وزارت قانون و انصا ف آمد کے موقع پر سیکرٹری قانون و انصاف راجہ نعیم اکبر اور دیگر اعلی افسران نے استقبال کیا۔وزیر قانون سردار ایاز صادق نے وزارت قانون کے افسران سے تعارفی ملاقات کی۔سیکرٹری قانون و انصاف نے وزارت کے افسران کا تعارف کرایا اور وزارت قانون کے مختلف ونگز اور سیکشنز کے حوالے سے وزیر قانون کو تفصیلی بریفنگ دی۔وفاقی وزیر قانون نے اس موقع پر وزیر مملکت شہادت اعوان اور پارلیمانی سیکرٹری برائے قانون و انصاف مہناز اکبر عزیز سے بھی ملاقات کی جس میں وزارت کے امور زیر بحث آئے۔ وفاقی وزیرِ قانون سردار ایاز صادق نے وزارت کے تحت جاری منصوبوں کو جلد پایہ تکمیل تک پہنچانے کی ہدایات جاری کی ہیں۔
