لاہور(این این آئی)پاکستان مسلم لیگ (ن)کی سینئر نائب صدر اور چیف آرگنائزر مریم نواز لاہور پہنچ گئی ہیں۔مریم نواز پی آئی اے کی پرواز پی کے 264 کے ذریعے ابوظہبی سے لاہور ایئر پورٹ پہنچی ،مریم نواز نے لاہور پہنچتے ہی سماجی رابطے کی ویب سائٹ پر اپنے ٹویٹ میں لکھا کہ پاک سر زمین شاد باد۔مسلم لیگ ن کے کارکن بڑی تعداد میں مریم نواز کے استقبال کیلئے لاہور ایئر پورٹ کے اندر اور باہر موجود۔لاہور ایئرپورٹ پر گفتگو کرتے ہوئے نائب صدر مسلم لیگ ن مریم نواز نے کہا کہ ساڑھے 3 ماہ بعد پاکستان واپس آئی ہوں، 3 سال بعد والد سے ملی اتنا عرصہ کبھی ان سے دور نہیں رہی، 4 ماہ والد کے ساتھ سیاسی حکمت عملی مرتب کرنے کا موقع ملا، نواز شریف بہت جلد واپس آئیں گے، کسی کی سزا پر خوش نہیں ہوں۔انہوں نے کہا کہ نوجوانوں کو مسلم لیگ ن میں لا کر پارٹی کو مضبوط کرنا چاہتی ہوں، پارٹی پہاڑ کی طرح ہے جو اس سے گرے گا وہ پتھر سے زیادہ نہیں ہوگا، شاہد خاقان عباسی کی پارٹی سے وابستگی پر کوئی سوال نہیں اٹھا سکتا،عمران خان اور ان کے حواریوں کے ساتھ جو ہوگا وہ مکافات عمل ہوگا۔
