بیجنگ (این این آئی) چین کی مشہور اداکارہ فین بنگ بنگ 5سال بعد سکرین اور مداحوں کے سامنے آگئیں۔غیرملکی میڈیا کے مطابق برلن فلم فیسٹیول کے موقع پر 41سالہ اداکارہ اپنی فلم گرین نائٹ تشہیر کیلئے پہنچیں۔اس موقع پر اداکارہ سے ان کے سکرین سے غائب رہنے سے متعلق سوالات بھی پوچھے گئے۔فین بنگ بنگ نے کہا کہ سب ٹھیک تھا، میں گھر پر تھی، میری غیر موجودگی اور بریک پر تشویش کا اظہار کرنے والوں کا شکریہ ادا کرتی ہوں۔چینی اداکارہ نے کہا کہ میں گھر پر تھی اور کچھ معاملات میں گھری ہوئی تھی، سب کی زندگی میں اچھا اور برا وقت ہوتا ہے، میرے لیے یہ سب بالکل پھر سے شروع کرنے کی طرح ہے۔انہوں نے کہاکہ جب آپ نیچے پہنچ کر اوپر چڑھنا شروع کرتے ہیں تو یہ بہت مشکل مرحلہ ہوتا ہے لیکن اسی وقت آپ بہت سی نئی چیزیں سیکھتے ہیں اور دنیا اور لوگوں کو الگ طریقے سے دیکھتے ہیں۔چینی اداکارہ نے کہا کہ سب سے بڑا چیلنج یہ تھاکہ میں نے 5 سال سے اداکاری نہیں کی، ان 5 سالوں کے درمیان میں نے بہت سی چیزیں کیں، میں ہمیشہ صحیح کہانی اور کردار تلاش کرنا چاہتی تھی۔فین بنگ بنگ نے کہا کہ 5سال تک فلم نہ بنانا اداکار کے لیے ظالمانہ ہوتا ہے۔
