لاہور( این این آئی)نامور کامیڈین اداکار افتخار ٹھاکر نے کہا ہے کہ جو لوگ وقت کو ضائع کرنے کی بجائے اس کی قدر کرتے ہیں وقت بھی انہی کی قدر کرتا ہے ، جس شخص نے وقت کی اہمیت کو سمجھ لیا وہ زندگی میں کبھی ناکام نہیں ہو سکتا، کبھی کبھی وقت کو بدلنے میں دہائیاں لگ جاتی ہیں لیکن بعض دفعہ وقت بدلنے میں لمحہ بھی نہیں لگتا۔ایک انٹر ویو میں افتخار ٹھاکر نے کہا کہ جو لوگ اپنی زندگی میں کسی ضابطے کے تحت چلتے ہیں وہ دوسرے لوگوں سے زیادہ سُکھی ہوتے ہیں ، جو شخص اپنی زندگی میں قواعد و ضوابط کا عادی ہوگا وہ یقینی طور پر وقت کو بھی اہمیت دیتا ہوگا اور کبھی اپنا وقت ضائع نہیں کرتا ۔ انہوں نے کہا کہ آج دیکھ لیں ہر شخص صر ف موبائل فون پر ہی گھنٹوں ضائع کر دیتا ہے اور آپ ان سے پوچھ لیں آپ نے کیا حاصل کیا ہے تو ان کے پاس کوئی جواب نہیں ہوگا۔میں نوجوانوں کو یہی تاکید کروں گا خوابوں کی دنیا سے باہر نکلیں اور عملی زندگی میں قدم رکھیں اور وقت کی قدر کریں۔
