لاہور( این این آئی)انسداد دہشتگردی کی خصوصی عدالت نے تحریک انصاف کے مرکزی رہنما اسد عمر اور چیئرمین پی ٹی آئی کی بہنوں عظمیٰ خان اور علیمہ خان سمیت دیگر کی عبوری ضمانت میں 31اکتوبر تک توسیع کر دی۔لاہور کی انسداد دہشتگردی کی خصوصی عدالت کے جج ارشد جاوید نے 9 مئی کو جلائو گھیرا ئوپر درج مقدمات میں چیئرمین پی ٹی آئی کی بہنوں اور اسد عمر سمیت دیگر کی عبوری ضمانتوں پر سماعت کی ۔دوران سماعت پولیس کی جانب سے عدالت میں ریکارڈ جمع نہ کروایا گیا۔اسد عمر کے وکیل نے کہا کہ ہم شامل تفتیش ہو چکے ہیں، صرف اتنا بتا دیا جائے کہ ہمارے شامل تفتیش ہونے کے بعد انہوں نے کیا کیا ہے؟۔سرکاری وکیل نے کہا کہ تفتیشی افسر کو دل کا دورہ پڑا ہے اس لئے ریکارڈ پیش نہیں کر سکتے۔اسد عمر کے وکیل نے کہا کہ یہ لوگ سب کو ہی ہارٹ اٹیک کروا رہے ہیں، اگلی تاریخ پر انہیں لازمی ریکارڈ پیش کرنے کا پابند کیا جائے۔عدالت نے آئندہ سماعت پر وکلا ء کو حتمی بحث کیلئے طلب کر لیا۔بعدازاں عدالت نے اسد عمر اور چیئرمین پی ٹی آئی کی بہنوں سمیت دیگر کی عبوری ضمانتوں میں 31 اکتوبر تک توسیع کر دی۔
