لاہور( این این آئی)سینئر اداکار عرفان کھوسٹ نے کہا ہے کہ مجھے اس بات کا اطمینان ہے کہ میں اپنے بچوں کو کامیابی کی جن منازل پر دیکھنا چاہتا تھا میرے بچے اس مقام پر پہنچ گئے ہیں ، سرمد کھوسٹ اور کنول کھوسٹ نے اپنی خاندانی روایات کو بڑی خوبصورتی سے آگے بڑھایا ہے ۔ایک انٹر ویو میں انہوں نے کہا کہ سرمد کھوسٹ نے جس طرح فلموں اور ڈراموں میں ڈائریکشن کے ساتھ ساتھ اداکاری میں نام کمایا ہے وہ قابل تعریف ہے ۔ میں یہ اس لئے نہیں کہہ رہا کہ وہ میر الخت جگر ہے بلکہ اس نے حقیقت میں اپنی صلاحیتوں کا لوہا منوایا ہے اور جو لوگ ڈائریکشن اور اداکاری کی سمجھ بوجھ رکھتے ہیں وہ اس کی گواہی دیں گے۔ انہوں نے کہا کہ کنول کھوسٹ اپنے شعبے میں کامیاب ثابت ہوئی ہے اور اس نے بھی ڈرامہ ڈائریکٹر اور پروڈیوسر کے طور پر اپنی صلاحیتوں کا لوہا منوایا ہے ، خوشی کی بات ہے کہ میرے بچے شوبز انڈسٹری میں اپنے داد اسلطان کھوسٹ اورمیرا نام روشن کر رہے ہیں۔
