اسلام آباد (این این آئی)سپیکر قومی اسمبلی راجہ پرویز اشرف نے ژوب میں پاک افغان سرحد کے قریب دہشتگردوں کے ساتھ جھڑپ میں فوجی جوانوں کی شہادت پر افسوس کا اظہار کرتے ہوئے کہاہے کہ دہشتگردی کے ناسور کو ختم کرنے کی جنگ میں ہمارے جوانوں کی قربانیاں ہمیشہ یاد رکھی جائیں گی۔ اپنے ایک بیان میں انہوں نے سیکیورٹی فورسز کی جانب سے بروقت کارروائی کرکے دہشتگردوں کی پاکستان میں دراندازی کی کوشش کو ناکام بنانے پر انہیں خراجِ تحسین پیش کیاہے۔۔سپیکر نے شہدا کے لواحقین سے تعزیت کا اظہار کرتے ہوئے کہاکہ دہشتگردی کے خلاف جنگ میں ہمارے فوجی جوانوں نے ناقابلِ فراموش قربانیاں دی ہیں، ملک و قوم کی حفاظت کے لیے اپنی جانوں کا نذرانہ پیش کرنے والے جوان قوم کے ہیرو ہیں۔انہوں نے کہاکہ پاک فوج کے جوانوں نے ہمیشہ سینہ سپر ہوکر دشمن کا مقابلہ کیا ہے، دہشتگردی کے ناسور کو ختم کرنے کی جنگ میں ہمارے جوانوں کی قربانیاں ہمیشہ یاد رکھی جائیں گی۔انہوں نے کہاکہ دہشتگردی کے خلاف جنگ میں پوری قوم مسلح افواج کے شانہ بشانہ کھڑی ہے۔سپیکر نے شہدا کے درجات کی بلندی اور پسماندگان کو صبرِ جمیل عطا فرمانے کی دعابھی کی۔
