اسلام آبا د(این این آئی)نگراں وفاقی وزیر اطلاعات، نشریات و پارلیمانی امور مرتضیٰ سولنگی نے کہاہے کہ میڈیا فورم چین اور پاکستان کے خلاف جاری پروپیگنڈا کا دفاع کر رہا ہے۔کامسٹیک میں آٹھویں چین پاکستان اقتصادی راہداری (سی پیک) میڈیا فورم سے خطاب کرتے ہوئے مرتضیٰ سولنگی نے کہاکہ اس تقریب میں شرکت میرے لئے باعث فخر ہے۔ انہوںنے کہاکہ سی پیک منصوبوں کے مقامی لوگوں پر مثبت اثرات مرتب ہو رہے ہیں۔ مرتضیٰ سولنگی نے کہاکہ میڈیا فورم چین اور پاکستان کے خلاف جاری پروپیگنڈا کا دفاع کر رہا ہے،۔ انہوںنے کہاکہ سی پیک کے ذریعے مقامی افراد کو روزگار کے مواقع میسر آئے۔ انہوںنے کہاکہ سی پیک کے ذریعے پاکستانی عوام کا مستقبل کے حوالے سے اعتماد بڑھا، سی پیک سے پاکستان کی معاشی ترقی کی رفتار تیز ہوئی۔ وفاقی وزیر اطلاعات نے کہا کہ سی پیک کے تحت توانائی کے شعبے میں متعدد منصوبے مکمل کئے گئے۔ انہوںنے کہاکہ موجودہ دور میں میڈیا کا کردار زیادہ اہم ہے۔
