اسلام آباد (این این آئی)صوبہ ہزارہ تحریک کی ایگزیکٹو کونسل کے وفد نے چیئرمین سینیٹ محمد صادق سنجرانی سے پارلیمنٹ ہاؤس میں ملاقات کی جس میں خطہ ہزارہ کو درپیش مسائل اورترقیاتی عمل پر تفصیلی تبادلہ خیال کیا گیا۔ وفد سے گفتگو کرتے ہوئے چیئرمین سینیٹ نے کہا کہ ترقیاتی منصوبوں پر کام تیز کرنے اور علاقائی محرومیوں کا ازالہ کرنے لیے ایوان بالا اپنا آئینی اور قانونی کردار ادا کرتا رہے گا۔ چیئرمین سینیٹ نے پارلیمنٹ کی سطح پر بھرپور کردار ادا کرنے کی یقین دھانی کرائی۔ چیئرمین سینیٹ نے کہا کہ ایوان بالا نہ صرف صوبائی اکائیوں بلکہ مختلف علاقوں کو درپیش مسائل کے حل کے لیے فعال کردار ادا کرتا رہا ہے۔انہوںنے کہاکہ علاقائی محرومیوں اور برابری کی سطح پر ترقی کے مواقع فراہم کرنے کے لیے ضروری قانون سازی کے لیے تجاویز دی جائیں۔ چیئرمین سینیٹ نے کہاکہ خطہ ہزارہ کے مسائل کے حل کے لیے تمام سیاسی جماعتوں کے مابین ہم آہنگی خوش آئند ہے۔ وفد میں مرتضیٰ جاوید عباسی، سینیٹر طلحہ محمود، سردار محمد یوسف اور دیگر رہنما شامل تھے۔
