کابل (این این آئی)افغانستان کے مغربی علاقے میں زلزلے کے نتیجے میں 30سے زیادہ افراد ہلاک اور سیکڑوں گھر تباہ ہو گئے ۔غیرملکی خبررساں ادارے کے مطابق مقامی حکام کی جانب سے سوشل میڈیا پرشیئر کی گئی تصاویرمیں کہاکہ 5.6 کی شدت کے زلزلے نے دوپہر کے وقت مغربی صوبہ بادغیس کے بیشتر علاقوں کو ہلا کررکھ دیا۔اس کے نتیجے میں اینٹوں کے گھر ملبے کا ڈھیربن گئے۔بادغیس ترکمانستان کی سرحد سے متصل واقع ہے۔بادغیس کی صوبائی انتظامیہ میں اطلاعات وثقافت کے ڈائریکٹر بازمحمد سروری نے ایک بیان میں بتایا کہ بدقسمتی سے ہماری ابتدائی اطلاعات سے ظاہرہوتا ہے کہ زلزلے میں خواتین اور بچوں سمیت30 افراد ہلاک اور چار زخمی ہوئے ۔انھوں نے کہا کہ مجاہدین کچھ متاثرہ علاقوں تک پہنچ چکے ہیں لیکن بادغیس پہاڑی صوبہ ہے اور ہلاکتوں کی تعداد میں اضافے کا اندیشہ ہے۔زلزلے سے متاثرہ علاقے میں موسلادھار بارش ہو رہی ہے۔ان کا اشارہ طالبان جنگجوئوں کی امدادی سرگرمیوں کی جانب تھا۔افغانستان کی ہنگامی امور کی وزارت کے ایمرجنسی آپریشنزسنٹر کے سربراہ ملا جانان سائق نے ہلاکتوں کی تعداد کی تصدیق کی ہے اور کہا ہے کہ 700 سے زیادہ مکانات کو نقصان پہنچا ۔
