لاہور ( این این آئی) پاکستان تحریک انصاف کے سینئر رہنما فواد چوہدری کی اہلیہ حبا فواد نے کہا ہے کہ یہ گرفتاری نہیں اغوا ہے،گھر میں پولیس والے گھس آئے اور بنا ایف آئی آر دکھائے اٹھا کر لے گئے، ہمیں بتایا جائے کہ انہیں کس رول کے تحت اٹھایا گیا۔ انہوں نے اپنے ردعمل کا اظہار کرتے ہوئے کہا کہ ہم اس کو گرفتاری نہیں کہیں گے،یہ تو سراسر اغوا ہے کہ ہم اب اپنے گھر میں بھی محفوظ نہیں، لوگ ہمیں گھر میں گھس کر اٹھاکر لے جائیں گے کس طرح کا ملک ہے یہاں کس طرح کا قانون ہے ۔ 8سے 10پولیس والے گیٹ کھول کر ہمارے گھر میں گھس آئے اور بغیر کوئی ایف آئی آر دکھائے فواد کو پکڑ کر لے گئے۔انہوں نے کہا کہ میری چیف جسٹس آف پاکستان ، وزیر اعظم پاکستان سے یہی درخواست ہے کہ بتایا جائے کہ امپورٹڈ حکومت جو کررہی ہے یا جس نے بھی فواد چوہدری کو اٹھایا ہے ہمیں بتایا جائے کہ انہیں کس رول کے تحت اٹھایا گیا، ہم سے کسی نے رابطہ نہیں کیا، ان کو چار ڈالوں میں بٹھا کر ان کا فون لے کر چلے گئے۔
