لاہور(این این آئی) گیس کی قیمتوں میں 35 فیصد اضافے کی اطلاعات کے خلاف مذمتی قرارداد پنجاب اسمبلی میں جمع کروادی گئی ۔مسلم لیگ( ن) کی رکن پنجاب اسمبلی راحت افزا کی جانب سے جمع کرائی گئی قرار داد کے متن میں کہاگیا ہے کہ پنجاب اسمبلی کا یہ ایوان گیس کی قیمتوں میں 35 فیصد اضافے کی اطلاعات کی شدید مذمت کرتا ہے۔عوام میں مزید مہنگائی برداشت کرنے کی ہمت اور سکت نہیں۔آٹا چینی گھی۔دالیں دوائیاں بجلی گیس سمیت ہر چیز مہنگائی کی حدیں توڑ چکی ہے۔بجلی اور گیس کی قیمتوں میں اضافے سے عوام کی زندگی مزید جہنم بن جائے گی۔گیس کی قیمت بڑھنے سے روٹی کی قیمت بڑھے گی اور بلوں میں مزید اضافہ ہوگا۔گزشتہ ہفتے پہلے بجلی میں 5 سے 35 فیصد اضافہ کیاگیا،اب گیس کی قیمت میں 35 فیصداضافے کی تجویز ہے۔آج دنیا میں سب سے زیادہ مہنگائی پاکستان میں ہے۔ سب سے کم آمدن بھی پاکستان میں ہے۔لہذا یہ ایوان وفاقی حکومت سے مطالبہ کرتا ہے کہ وہ گیس۔بجلی سمیت دیگر اشیا ضروریہ کی قیمتوں میں فوری طور پر کمی کرے۔
