لاہور( این این آئی )کورونا وبا ء کے پھیلا میں کمی کے باعث ملک بھر کے تعلیمی ادارے 100 فیصد حاضری کے ساتھ کھل گئے، 12 سال اور زائد عمر کے طلبا کیلئے ویکسی نیشن لازمی قرار دیدی گئی جس کے لئے بعض سرکاری سکولوں نے طلبہ سے ویکسی نیشن کیلئے گھر کے سربرا ہ کی رضا مندی کا فارم بھی پرکروانا شروع کردیا ۔تفصیلات کے مطابق کوروناوباء کی شدت کے باعث تعلیمی اداروں میںپچاس فیصد حاضری کے ساتھ تعلیمی سر گرمیاں جاری رکھنے کا فیصلہ کیاگیا تھاتاہم حالیہ دنوں میںوباء کی شدت میںکمی کے بعدگزشتہ روز دوبارہ سے 100فیصد حاضری کے ساتھ کلاسز کا آغاز ہوگیا ہے ۔ 100فیصد حاضری کے باعث تعلیمی اداروں کے باہرغیر معمولی رش دیکھنے میں آیا اور گروپس کی صورت میں آنے کی وجہ سے ایک دوسرے سے ملاقات نہ کر سکنے والے طلبہ ایک دوسرے کو دیکھ کر انتہائی خوش ہوئے ۔دوسری جانب بعض سرکاری سکولوں نے 12سال سے زائد عمر کے طلبہ سے ویکسی نیشن کرانے کیلئے گھرکے سربراہان کی رضامندی کا فارم بھی پرکراناشروع کر دیا ہے ۔فارم میںطلبہ کی عمر،کلاس ،والد کا نام، شناختی کارڈنمبراوردستخطوں کے خانے بنائے گئے ۔ سکولوںکی انتظامیہ کی جانب سے فارم پر واضح طو رپر لکھاگیا کہ ویکسی نیشن والدین او رمحکمہ صحت کے مابین معاملہ ہے اور سکول انتظامیہ کا اس سے قطعاً کوئی تعلق نہیں ۔اس تحریر کے باعث والدین میں شدید تشویش پائی جاتی ہے جس کی وجہ سے والدین اپنے بچوں کے فارم کرنے میں ہچکچاہٹ کا مظاہرہ کر رہے ہیں۔
