اسلام آباد (این این آئی)وفاقی وزیر برائے صنعت و پیداوار رانا تنویر حسین نے کہا کہ خوشحال، پرامن اور متحد پاکستان کے لیے مل کام کرنا ہوگا۔وزارت صنعت و پیداوار کی جانب سے جاری یوم آزادی کے موقع پر اپنے پیغام میں وفاقی وزیر برائے صنعت و پیداوار رانا تنویر نے تمام اہل وطن کویوم آزادی مبارک دیتے ہوئے کہا کہ یہ وطن پاک سرزمین ہمارے بزرگوں نے بڑی قربانیوں کے بعد حاصل کیا،ہم اپنے آباؤ اجداد کی قربانیوں کو خراج تحسین پیش کر تے ہیں، خوشحال، پرامن اور متحد پاکستان کے لیے مل کام کرنا ہے۔ انہوں نے کہا کہ نوجوان اس ملک کا قیمتی اثاثہ ہیں، نوجوان اپنی محنت اور لگن سے ملکی ترقی میں شامل ہوں،ہم سب مل کر ایک ایسی باہمت قوم بنیں جو موجودہ چیلنجز کے سامنے سربلند ہو۔ رانا تنویر حسین نے کہا کہ انصاف، مساوات اور بھائی چارے کی اقدار کو برقرار رکھنا ہے، ہم سب کو اپنی پیاری قوم کے روشن مستقبل کی تعمیر کے لیے مل کر کام کرنا ہے۔
