اسلام آباد (این این آئی) وفاقی وزیر اطلاعات و نشریات مریم اورنگزیب نے کہا کہ دہشت اور تشدد والے مناظر ٹی وی پر نہ چلانے کے ضابطہ اخلاق سے متعلق پیمرا آرڈر پر بعض تحفظات سامنے آئے ہیں ،اس آرڈر میں دہشت گردی، اس کے بعد کے مناظر، لاشیں، تباہی نہ دکھانے کا کہا گیا ہے ،اس حکم کا بنیادی مقصد عوام کو خوف ودہشت سے بچانا ہے ۔ایک ٹوئٹ میں وزیر اطلاعات نے کہا کہ دہشت گردوں کا اصل مقصد اور ہدف عوام میں خوف و ہراس پھیلانا ہی ہوتا ہے،دنیا بھر میں یہ حدود متعین ہیں، ہر ذمہ دار ادارہ اور آرگنائزیشن ان کی پاسداری کرتا ہے۔ انہوں نے کہا کہ دہشت گردی کی کارروائیوں کی کوریج کا ایک عالمی ضابطہ ہے،یہ ملکی قانون کا حصہ ہے۔ وزیر اطلاعات نے کہا کہ پوری دنیا میں ان ضابطوں پر بلا استثنا عمل ہوتا ہے۔ انہوں نے کہا کہ دہشت گردی کے واقعات کی براہ راست نشریات دکھانے سے دہشت گردوں کو بھی مدد ملتی ہے۔انہوں نے کہا کہ آپریشن کے بعد کی حساس معلومات بھی شرپسندوں کو مل جاتی ہیں۔ مریم اورنگزیب نے کہا کہ آزادی اظہار کے حق کو مقدس سمجھتے ہیں، اس حق کے لئے ہم نے ہمیشہ جدوجہد کی ہے۔ انہوں نے کہا کہ آزادی اظہار رائے پر سمجھوتہ نہ کرتے ہوئے قوانین پر عمل کریں گے۔
