ماسکو(این این آئی)برازیل، روس، بھارت، چین اور جنوبی افریقا جیسے عالمی معیشتوں کے گروپ برکس میں متعدد نئے ممالک شامل ہونے کے خواہش مند ہیں اور اس گروپ کی توسیع کا موضوع ایجنڈے میں سرفہرست ہے۔غیرملکی خبررساں ادارے کے مطابق یہ بات کریملن کے ترجمان دمتری پیسکوف نے ایک بیان میں کہی ۔انھوں نے کہا کہ درحقیقت برکس کی توسیع کا موضوع ایجنڈے میں سرفہرست ہے۔اس پر آیندہ سربراہ اجلاس میں غور کیا جائے گا۔پیسکوف چین کے گروپ کو تیزی سے متنوع بنانے کے تقاضے پر بھارت اور برازیل کی جانب سے مزاحمت کے حوالے سے میڈیا رپورٹس پر تبصرہ کررہے تھے۔انھوں نے کہا کہ برکس کے رکن ممالک کے درمیان اس توسیع سے نمٹنے کے طریق کار پر اختلاف ہے۔انھوں نے کہا کہ آیندہ سربراہ اجلاس کے دوران میں ان تمام پہلوں پر ضرور تبادلہ خیال کیا جائے گا۔ کریملن کے ترجمان نے صحافیوں کو بتایا کہ سربراہان مملکت (اس معاملے پر)اپنے موقف کے بارے میں بات کریں گے۔برکس سربراہ اجلاس 22 سے 24 اگست تک جنوبی افریقا کے شہر جوہانسبرگ میں ہوگا۔ توقع ہے کہ رکن ممالک گروپ میں شامل ہونے کے لیے الجزائر اور بیلاروس جیسے متعدد ممالک کی سرکاری درخواستوں کا جائزہ لیں گے۔
