لاہور( این این آئی) سابق وزیراعلیٰ پنجاب حمزہ شہباز شریف نے کہا ہے کہ پی ٹی آئی کے سابق چیئرمین کی حکومت میں ہمارے اوپر جھوٹے کیسزبنائے گئے لیکن ہم عدالتوں سے سر خرو ہوئے ،پی ٹی آئی حکومت کے دوران بھی ایف آئی اے نے کہا کہ ہمارے پا س کوئی ٹھوس ثبوت نہیں جس کی بناء پر میں اور شہباز شریف بری ہوئے ،آج نواز شریف بھی با عزت بری ہورہے ہیں ،ہم سب کو مل کر عوام کے مستقبل کے حوالے سے جامع حکمت عملی اپنانی چاہیے ۔ عدالت میں پیشی کے موقع پر گفتگو کرتے ہوئے حمزہ شہباز نے کہا کہ جھوٹے کیس بنا کر قومی خزانے کو نقصان پہنچایاگیا ،قوم سے جھوٹ بولا گیا ،جن لوگوں نے جھوٹے کیس بنائے وہ بھی آج کٹہرے میں ہیں ،اس ملک کا وقت قیمتی ہے اور عوام کا وقت قیمتی ہے ،اب ہم سب کو مل کر لوگوں کے مستقبل کے حوالے سے جامع حکمت عملی اپنانی چاہیے ،میں جھوٹے کیس بنانے والوں کا معاملہ اللہ کے حوالے کرتا ہوں ۔ حمزہ شہباز نے کہا کہ میں سیاسی کارکن ہوں میری امید اور دعا ہے کہ الیکشن وقت پر ہونے چاہئیں،لیول پلینگ فیلڈ صاف اور شفاف انتخابات کے لئے ضروری ہے ،جب الیکشن ہوں گے تب سب کو نظر آئے گا۔
