اسلام آباد(این این آئی)الیکشن کمیشن آف پاکستان (ای سی پی)کے ترجمان ہارون شنواری نے کہا کہ ملک بھر میں سخت حفاظتی اقدامات کے ساتھ عام انتخابات کے لیے ووٹنگ کا عمل بلا تعطل اور پرامن طریقے سے جاری ہے۔خصوصی گفتگو میں انہوںنے کہاکہ ابھی تک تشدد اور دھاندلی کا کوئی واقعہ رپورٹ نہیں ہوا، انتخابی عمل کے پرامن انعقاد کے لیے سخت سکیورٹی کو یقینی بنانے کے لیے تمام وسائل بروئے کار لائے جا رہے ہیں۔انہوں نے کہا کہ بڑی تعداد میں لوگ اپنے ووٹ کاسٹ کرنے کے لیے اپنے متعلقہ پولنگ سٹیشنز کا دورہ کر رہے ہیں۔انہوں نے کہا کہ پولنگ سٹیشنوں پر عوام کا ٹرن آٹ تسلی بخش ہے۔الیکشن کمیشن آف پاکستان نے شکایات درج کرنے کے لیے ایک ہیلپ لائن قائم کی ہے، عوام ہیلپ لائن 051-111327000 پر کال کر کے یہاں 24 گھنٹے اپنی شکایات درج کر سکتے ہیں۔انہوں نے کہا کہ ووٹرز 8300 پر ایس ایم ایس کے ذریعے شناختی کارڈ نمبر بھیج کر ووٹ اور پولنگ سٹیشن کی تفصیلات حاصل کر سکتے ہیں۔انہوں نے کہا کہ الیکشن کمیشن نے چاروں صوبوں میں 90 ہزار 6 سو75پولنگ سٹیشنز قائم کیے ہیں۔انہوں نے کہا کہ آج عام تعطیل ہے تاکہ ووٹرز کو پریشانی سے پاک ماحول میں اپنا حق رائے دہی استعمال کرنے میں آسانی ہو۔
