کراچی (این این آئی)انتخابی نتائج میں مبینہ دھاندلی کے خلاف جماعت اسلامی نے (کل) جمعہ کو یوم سیاہ منانے کا اعلان کردیا۔پریس کانفرنس کرتے ہوئے امیر جماعت اسلامی کراچی حافظ نعیم الرحمن نے کہا ہے کہ ہم عدالت بھی گئے، یہ پاکستان کے خلاف سازش ہے، ہم اس رزلٹ اور جعل سازی کو نہیں مانتے۔انہوںنے کہاکہ متحدہ قومی موومنٹ پاکستان والے بینرز پر نجانے کس کاشکریہ اداکر رہے ہیں۔امیرجماعت اسلامی کراچی نے کہا کہ عوام نے جن لوگوں کو مستردکردیا تھا، کراچی میں ایک مرتبہ پھر ان کو مسلط کروا دیاگیا ہے، ایم کیوایم نے دھونس دھمکی سے ووٹ لیے ، ہم اس عمل کوملک دشمنی قرار دیتے ہوئے جمعہ کو یوم سیاہ منانے کااعلان کرتے ہیں۔کراچی میں میٹرک اور انٹر کے امتحانی نتائج پر بات کرتے ہوئے حافظ نعیم الرحمن نے کہا کہ حکمرانوں کے ذہن میں ہے کراچی کے نوجوانوں کو اگے نہ بڑھنے دیا جائے، کاپیوں کی چیکنگ بھی صحیح طرح نہیں ہوئی سارا غصہ ملبہ طلبہ پر نکالا گیا۔انہوںنے کہاکہ مختلف عہدوں پر بیٹھے کرپٹ افراد اس عمل کے ذمہ دار ہیں، کراچی کیامتحانی پرچے مشکل بنائے گئے، جب سندھ ٹیکسٹ بورڈ کا نصاب ایک ہے تو امتحان الگ الگ کیوں لیاجا رہا ہے۔
