اسلام آباد (این این آئی)مسلم لیگ (ن)کے صدر شہباز شریف کی وزارت عظمی کے لیے نامزدگی کے بعد پارٹی میں مایوسی پھیل گئی، جس کا اظہار سوشل میڈیا پر بھی کیا جانے لگا۔تفصیلات کے مطابق انتخابات سے قبل مسلم لیگ(ن)نے دعویٰ کیا تھا کہ وزارت عظمیٰ کیلئے پارٹی کا انتخاب نواز شریف ہوں گے، جس کی تصدیق عام انتخابات سے قبل پارٹی کی جانب سے ایک بھرپور میڈیا مہم کے ذریعے بھی کی گئی تاہم مسلم لیگ (ن)سادہ اکثریت حاصل کرنے میں ناکام رہی، جس کے نتیجے میں 3 بار وزیراعظم بننے والے نواز شریف کے بجائے شہباز شریف کے وزیراعظم کے امیدوار بننے کی راہ ہموار ہوئی جبکہ نواز شریف بظاہر سائیڈ لائن ہو چکے ہیں، اس لیے پارٹی کے عام اراکین کو یہ حقیقت قبول کرنا مشکل ہو رہا ہے، گزشتہ روز ایکس پرپاکستان کو نواز دو کے ہیش ٹیگ کے ساتھ مسلم لیگ (ن)کے حامیوں کی جانب سے لاکھ کے قریب ٹوئٹس کی گئیں۔
