کراچی (این این آئی)لالی و بالی ووڈ اداکارہ ماورا حسین نے اچانک ساتھی اداکار امیر گیلانی سے شادی کر کے مداحوں کو 440 واٹ کا جھٹکا دیا ہے۔اگر ایسا کہا جائے کہ ماورا اور امیر کی شادی کی تصویروں نے سوشل میڈیا ہائی جیک کیا ہوا ہے تو یہ غلط نہ ہو گا۔گزشتہ شام ماورا حسین کی امیر گیلانی سے شادی کی تصویروں کا سامنے آنا ہی تھا کہ یہ پاکستان سمیت بھارتی میڈیا پر بھی وائرل نظر آئیں۔شوبز انڈسٹری کی معروف شخصیات جہاں اس جوڑی کو شادی کی مبارک باد دے رہی ہیں وہیں مداح بھی خوش گوار حیرانی میں ڈوبے اپنی پسندیدہ آن اسکرین جوڑی کے حقیقت میں بھی ہاتھ تھامنے پر ان کے لیے نیک تمناں کا اظہار کر رہے ہیں۔دوسری جانب انسٹاگرام پر 9.1 ملین فالوور رکھنے والی ماورا حسین کو بہن و اداکارہ عروہ حسین نے بھی سوشل میڈیا پر مبارک باد دی ہے اور اپنے بہنوئی امیر گیلانی کو اپنے خاندان میں خوش آمدید کہا ہے۔عروہ حسین اور ان کے شوہر، اداکار و گلوکار فرحان سعید نے مشترکہ پوسٹ شیئر کرتے ہوئے خوبصورت تصاویر اپلوڈ کی ہیں۔ان تصاویر میں جہاں یہ دونوں جوڑیاں حسین نظر آ رہی ہیں وہیں صارفین کی نظریں فرحان اور عروہ کی ننھی پری، جہاں آرا پر بھی جم گئی ہیں۔سوشل میڈیا پر اس وقت ہر جگہ صرف ماورا اور امیر کی شادی کی تصاویر دکھائی دے رہی ہیں جنہیں صارفین بے حد پسند کر رہے ہیں۔
