لاہور( این این آئی)ناموراداکارہ ریشم نے کہا ہے کہ ملک کو صاف ستھرارکھنے اور خصوصی طور پر شجر کاری مہم کو عروج دینے کیلئے شوبز اورکھیلوں سمیت دیگر شعبوںسے وابستہ نامور شخصیات کو قیادت کرنی چاہیے ، پاکستانی شہری مختلف شعبوں میںموجود شخصیات کا عقیدت کی حد تک احترام کرتے ہیں اس لئے یہ شخصیات کسی بھی مہم کی کامیابی میں زیادہ موثر کردارادا کر سکتی ہیں ۔ایک انٹر ویو میں ریشم نے کہا کہ ہمارے ہاں تعلیم کے نام پر ہزاروں روپے فیسیں وصول کی جاتی ہیں لیکن بد قسمتی سے بچوںکو ملک کے قوانین سے آگاہی ، ملک کو صاف ستھرا رکھنے اور اچھے اخلاق کے حوالے سے نہیں بتایا جاتا جبکہ یہی وہ عمر ہوتی ہے ہے جس میں بچوں کو صحیح راستے پر گامزن کیا جا سکتا ہے ۔ اس کے برعکس ہماراسارا فوکس انہیں انگریزی پڑھانے پر ہوتا ہے اور باقی سارے معاملات پس پشت ڈال دئیے جاتے ہیں ۔ ریشم نے کہا کہ ضروری قوانین سے آگاہی ، ملک کوصاف ستھرا رکھنے ، لوگوں کی مدد اور اچھے اخلاق کے حوالے سے مضامین کو پرائمری نصاب کا لازمی حصہ بنایا جائے اور کسی بھی طالبعلم کی کامیابی میں اس کے نمبر شامل ہونے چاہئیں۔
