اسلام آباد(این این آئی)پاکستان پیپلز پارٹی نے وفاقی حکومت کی متبادل انرجی کی نئی پالیسی کو مسترد کردیا ہے۔ اپنے بیان میں پلز پارٹی کی مرکزی رہنما شازیہ مری نے کہاکہ وفاقی حکومت کی جانب سے نیٹ میٹرنگ کے قوانین میں ظالمانہ تبدیلیاں قابل مذمت ہیں۔ انہوں نے کہاکہ شمسی توانائی صارفین کو 27 روپے فی یونٹ کے بجائے صرف 10 روپے فی یونٹ پر بجلی فروخت کرنے پر مجبورکیا جارہا ہے۔ شازیہ مری نے کہاکہ یہ عمل متبادل انرجی صارفین پر یہ براہ راست حملہ اور پاکستان کے قابل تجدید توانائی کے مستقبل سے غداری ہے۔ انہوںنے کہاکہ صارفین کو قومی گرڈ سے 65 روپے یا اس سے زائد فی یونٹ کے نرخوں پر بجلی خریدنے کے لیے پابند کیا جاتا ہے۔ انہوںنے کہاکہ وفاقی حکومت گرین انرجی پر جانے والے صارفین کی حو صلہ افزائی کرنے کے بجائے ان سیکھلی جنگ کررہی ہے۔ پیپلزپارٹی کی رہنما نے کہاکہ قیمتوں میں یہ 550 فیصد کا فرق ظالمانہ اور عام عوام کا معاشی استحصال ہے۔ انہوںنے کہاکہ وفاقی حکومت کی طرف سے پاور سیکٹر میں موجود مافیاز، کرپشن اور نااہل افراد کی سرپرستی جاری ہے، نیٹ میٹرنگ سے ”عام صارفین پر 90 پیسے فی یونٹ کا بوجھ پڑتا ہے” ایک کھلا دھوکہ ہے۔ شازیہ مری نے کہاکہ حقیقت یہ ہے کہ 18 روپے فی یونٹ”آئیڈل کپیسٹی پیمنٹس” اور 600 ارب روپے سالانہ بجلی چوری اور بلوں کی عدم ادائیگی میں ضائع ہو رہے ہیں۔ شازیہ مری نے کہاکہ ان سنگین مسائل کو حل کرنے کے بجائے، وفاقی حکومت ملک کو توانائی میں خود کفیل بنانے والوں کو سزا دے رہی ہے۔ شازیہ مری نے کہاکہ یہ پالیسی پاکستان کی شمسی توانائی کی صنعت کو تباہ کر دے گی، جس سے گھریلو اور تجارتی صارفین کے لیے شمسی توانائی ناقابل عمل ہو جائے گی،یہ عمل قابل تجدید توانائی میں مقامی اور غیر ملکی سرمایہ کاری کو روکے گی، اور فرسودہ اور ناکام گرڈ پر انحصار بڑھا دے گی۔ شازیہ مری نے کہاکہ حکومتی عمل عوام کو ناقابل برداشت نرخوں پر بجلی خریدنے پر مجبور جبکہ گرین انرجی کے مواقع ختم ہوں گے۔ شازیہ مری نے کہاکہ بند کمروں میں بیٹھ کر بنا مشاورت کے کئے جانے والے فیصلیعوام کے بجائے طاقتور لابیوں اور فوسل فیول انڈسٹری کے مفادات کے تحفظ کا عندیہ دیتے ہے۔ شازیہ مری نے کہاکہ وفاقی حکومت کا یہ اقدام پاکستان کی توانائی کی خودمختاری اور معاشی آزادی پر براہ راست حملہ ہے۔ انہوںنے کہاکہ وفاقی حکومت اس ظالمانہ پالیسی کو فوری طور پر واپس لے اور ذمہ دار افراد کے خلاف قانونی کارروائی کا مطالبہ کرتے ہیں، حکومتی فیصلہ قابل تجدید توانائی کے مستقبل کو تباہ کر رہے ہیں۔شازیہ مری نے کہاکہ وفاقی حکومت نے اپنی عوام دشمن پالیسی واپس نہ لی، تو ہم اس کے خلاف عدالتی، سیاسی اور عوامی سطح پر سخت مزاحمت کریں گے۔ انہوںنے کہاکہ یہ صرف ایک توانائی پالیسی نہیں بلکہ عوام کے خلاف معاشی جنگ جس پرہم خاموش نہیں رہیں گے۔ انہوںنے کہاکہ حکومت ہمارے مستقبل کو تجارتی مفادات کے ہاتھوں فروخت کرنا بند کرنا ہوگا۔
