اسلام آباد(این این آئی)پاکستان تحریک انصاف کے سینئر مرکزی رہنما و سابق وفاقی وزیر ہمایوں اختر خان نے کہا ہے کہ جس طرح پی ڈی ایم کا اتحاد کئی جماعتوں پر مشتمل ہے اسی طرح ان کے ذاتی مفادات کا بیانیہ بھی الگ الگ پردے میں لپٹاہوا ہے ، مسلم لیگ (ن) کی حکومت معیشت کا ستیا ناس نہیںبلکہ سوا ستیا ناس کرکے گئی ، سابقہ دور میں تاریخ کے مہنگے ترین کمرشل قرضے لئے گئے جس کی ماضی میں کوئی مثال نہیں ملتی ،اپوزیشن سامنے بیٹھ کربات کرنے کا حوصلہ نہیں رکھتی اس لئے ” میں نہ مانوں ” کی رٹ لگارکھی ہے ۔ پارٹی دفترمیں وسطی پنجاب سے تعلق رکھنے والے رہنمائوں سے گفتگو کرتے ہوئے ہمایوں اخترخان نے کہا کہ مسلم لیگ (ن) اور پیپلز پارٹی نے وفاق اور صوبوں میں اقتدار کی باریاں لیں اور یہ چند سالوں نہیں بلکہ دہائیوں پر مشتمل ہیں جبکہ دوسری جانب تحریک انصاف کو مرکزی حکومت میں آئے ہوئے تین سال کا عرصہ مکمل نہیں ہوااوراپنی ناکامیوں کابوجھ بھی اس کے کندھوں پر ڈالنے کی کوشش کی جارہی ہے ۔
