اسلام آباد (این این آئی)سیکرٹری جنرل پیپلز پارٹی سید نیر بخاری نے پی ڈی ایم کے امیدوار حمزہ شہباز شریف کو دوبارہ وزیراعلی پنجاب منتخب ہونے پر مبارکباد دی ہے ۔ اپنے بیان میں انہوںنے کہاکہ وفاق سے نکالے گئے عمران خان پر پنجاب اسمبلی اراکین نے بھی عدم اعتماد کر دیا ہے ۔ انہوںنے کہاکہ آصف زرداری نے ملکی تاریخ میں اتحادی جماعت کا دوبارہ وزیراعلی منتخب کرانے کا پہلا اور منفرد اعزاز حاصل کیا ہے ۔ انہوںنے کہاکہ آصف علی زرداری پارلیمانی جمہوری نظام کے تسلسل پر راہبر جمہوریت کہلانے کے حق دار ہیں ۔ نیئر حسین بخاری نے کہاکہ چویدری شجاعت کے جمہوری کردار سے پنجاب میں غیر جمہوری سوچ کو شکست فاش ہوئی ہے ۔ انہوںنے کہاکہ پنجاب اسمبلی ممبران نے آئینی ہتھیار ووٹ استعمال کے زریعے بدزبان بداخلاق بدتمیز بریگیڈ کا بوریا بستر گول کیا ہے ۔ انہوںنے کہاکہ پارلیمنٹ میں ہارنے والا عمران خان سپریم کورٹ کے سہارے سے بھی محروم رہے گا ۔ انہوںنے کہاکہ پیپلز پارٹی آئین کے محور و مرکز پارلیمنٹ کی بالادستی پر یقین رکھتی ہے ۔
