راولپنڈی (این این آئی)پاک فوج کی ملک بھر میں سیلاب سے متاثرہ علاقوں میں امدادی سرگرمیاں ، متاثرین کو طبی سہولیات اور کھانا پہنچایا ، سندھ اور بلوچستان میں مزید ٹیمیں بھی تیار ہیں ۔آئی ایس پی آر کے مطابق پاک فوج کے دستے ملک کے مختلف حصوں میں حالیہ سیلاب سے متاثرہ علاقوں میں امدادی سرگرمیوں میں سول انتظامیہ کی مدد کر رہے ہیں، پاک فوج کی ایمرجنسی ریسپانس ٹیمیں متاثرہ علاقوں ڈے پانی نکالنے اور متاثرین کو غذائی ضروریات اور طبی امداد فراہم کرنے میں مسلسل مصروف ہیں، پاک فوج کی ڈی واٹرنگ ٹیمیں جامشورو، گھارو گرڈ سٹیشن اور جنوبی کراچی سمیت شاہراہ فیصل، نیپا چورنگی، لسبیلہ، تربت اور کوئٹہ میں امدادی کارروائیاں کررہی ہیں، پاک فوج کی ٹیموں نے طبی سہولیات سمیت ریلیف کیمپ قائم کئے اور مقامی رہائشیوں میں ضروری خوراک اور راشن تقسیم کیا، امدادی سرگرمیوں اور سیلاب کی وجہ سے کسی بھی ہنگامی صورتحال سے نمٹنے کے لئے رسپانس ٹیمیں سندھ اور بلوچستان کے مختلف مقامات پر تعینات ہیں، پاک فوج کے دستوں اور موبائل میڈیکل ٹیموں نے جامشورو، گھارو، کیماڑی اور نیپا چورنگی کے علاقوں میں سینکڑوں مقامی لوگوں کو امدادی سامان اور مفت ادویات فراہم کیں، طبی ٹیم نے بلوچستان کے کوئٹہ، تربت اور لسبیلہ میں بھی 1500 سے زائد افراد کو طبی امداد فراہم کی۔
